أشرار الأنمي: يبغضهم المنطق و يعشقهم الفانز.

15 min


0
111 shares

كنت بستغرب جدا لما بشوف شخصياتVillains “شرير” ليها فانز و جمهور كبير بشكل يكاد
في بعض الأحيان يفوق جمهور الشخصيات الرئيسية للأنمي نفسها. زي مثلا شخصية كيرا، اللي خلال فترة ما إعتبرته مجرد قاتل متسلسل مصاب بجنون العظمة.
أو مادارا أوتشيها اللي جوزيف ستالين لو كان لسه عايش و بيتابع أنمي كان هيبقى فخور جدا بيه؛ بما إنه طبق مقولة ستالين بمعناها الحرفي:

” الموت هو حل لكل المشاكل: لا بشر؛ لا مشاكل”

شرير الانمي العظيم Madara Uchiha من انمي ناروتو شيبودن
Madara Uchiha

رد الفعل

كنت بستغرب الفئة دي من الناس اللي بتتعاطف مع شخصية المجرم أو السفاح فقط لإن ماضيه كان مأساوي. أو في الحالة الأسوأ، إنهم شايفين إن أيدولوجيته صحيحة و أفعاله قابلة للتبرير، بصرف النظر عن مدى دمويتها و عدم أخلاقيتها.

جايز دا السبب اللي خلاني من وقت ما بدأت أتابع أنمي، أبعد تمامًا عن فكرة التعاطف مع شخصيات ال Villains. سواء بسبب ماضيهم أو بسبب أيدولوجياتهم.
لحد من حوالي أسبوعين تقريبا
..

من حوالي أسبوعين، إكتشفت شخصية عرفتني على نوع جديد من الـ Villains مصادفنيش في أي أنمي شفته قبل كدا. نوع من الـ Villains مختلف عن كل الأنواع اللي شفتها لحد دلوقتي. نوع من ال Villains لا يزال محتفظ بجزء و لو بسيط من إنسانيته، و عنده الشجاعة إنه يعترف بإنه كان غلط. و مش بس كدا لا، و كمان يحاول يصلح من نفسه و يكفر عن ذنوبه و أخطاؤه. و في خلال كل دا يكتسب إحترام أعداؤه و كمان ثقتهم. نوع لقيت نفسي لأول مرة، مجبر إني أحترمه.
نوع ال Villains اللي بينتمي له شخصية Scar من أنمي
“Full Metal Alchemist: Brotherhood”

شخصية سكار Scar من انمي Full Metal Alchemist: Brotherhood
شخصية سكار

بداية تغير وجهة النظر


إنطباعي الأول عن شخصية سكار مع أول ظهور له كان إنطباع تقليدي إلى حد ما. مجرد قاتل متسلسل بيستهدف الخيميائيين. مجرد Villain تقليدي زي كل ال Villains اللي موجودين في أي أنمي. لكن تدريجيا، سكار أثبتلي إني كنت متسرع جدا في الحكم عليه، و تدريجيا بدأت أتأكد إن الشخصية دي مش زي أي Villain شفته في أنمي قبل كدا.

زي كتير من ال Villains في عالم الأنمي، سكار مر بتجربة مأساوية غيرت مسار حياته بالكامل: إبادة جماعية و حملة تطهير عرقي شاملة؛ خسر بسببها عائلته و أرضه و بلده كلها. حرب حولته من راهب متدين منعزل، إلى قاتل محترف شديد الخطورة. بتحركه و توجهه حاجة واحدة بس هي “رغبة الإنتقام”

الإنطباع الأول

في البداية كان ممكن أقول إن عمليات سكار الإنتقامية و إغتيالاته ضد الخيميائيين مبررة بالكامل و عادلة تماما؛  طالما إنه بيستهدف بالإغتيالات دي الخيميائيين اللي شاركوا في حرب الإبادة العرقية في إشفال. لكن لما بدأ يستهدف خيميائيين غير عسكريين ملهمش أي تلاتين علاقة بحرب إشفال زي “شو تاكر”
 – بصرف النظر عن إنه يستاهل اللي حصله – و إدوارد إلريك، بدأت أقتنع إنه ميفرقش كتير عن باقي نوعيات ال Villains التانية.



 و العجيب في الموضوع إن دا كان نفس رأي زعيم الأقلية الإشفالية لما قاله :
” إنتقامك مش هيخلق إلا دايرة أبدية من العنف و الكراهية ، لازم تقطع سلسلة الكراهية دي للأبد “
و كما هو متوقع من قاتل متسلسل، مجرد كلمات واعظة عن خطيئة الكراهية و الإنتقام مش هيبقى ليها تأثير على إنسان مبقاش عنده حاجة يخسرها.
لكن لما كلمات الوعظ دي تتجسد في صورة حية واقعية قدامه. صورة خلته يكتشف إن الإغتيالات اللي نفذها دي خلت مفيش فرق بينه و بين مجرمي الحرب. المجرمين اللي حرموه من عيلته و أرضه. ساعتها بس سكار بدأ يكتشف إنه تحول لنسخة طبق الأصل من السفاحين اللي كانوا السبب في مأساته

بداية التحول

“وينري روكبيل”، تاني نقطة تحول رئيسية في حياة سكار. البنت اللي أبوها و أمها كانوا أول ضحيتين يقتلهم سكار، برغم إنهم أنقذوا حياته و حياة ناس كتير من المدنيين الإشفاليين. برغم إنهم رسميا أطباء في الجيش الأميستري ، جيش العدو ، إتقتلوا على إيد الشخص اللي أنقذوا حياته

معرفة وينري بهوية الشخص اللي قتل أبوها و أمها كانت صدمة كبيرة بالنسبة ليها. و اللي زاد الصدمة دي سوءا إن الشخص اللي قتلهم كان هو نفسه آخر شخص أنقذوا حياته. و اللي نيل الموضوع أكتر و أكتر كان إنه مش بس قتل أبوها و أمها، لكن كمان حاول يغتال إدوارد و ألفونس اللي هي بتعتبرهم إخواتها.

صدمة بالقوة دي كانت كفيلة إنها تحول وينري من بنت بريئة إلى قاتلة متعطشة للإنتقام. نسخة أنثوية طبق الأصل من سكار. هنا بس سكار أدرك مدى خطأ مفهومه عن العدالة و الإنتقام. من وجهة نظره هو كان بيحقق العدالة الإلهية ، لكن مكانش واخد باله إن مع كل هدف بيغتاله و مع كل ضحية بيقتلها ، دايرة الكراهية بتزداد في الإتساع.

هنا فقط سكار إفتكر الجملة اللي قالهاله معلمه السابق :

” إنتقامك مش هيخلق إلا دايرة أبدية من العنف و الكراهية “


هنا سكار شاف معلمه كان قصده إيه لما قال الجملة دي، مشهد وينري البنت الجميلة البريئة و هي ماسكة المسدس ناحية سكار، و مفيش حاجة بتفصل بين صباعها و الزناد إلا قرار القتل، قرار سلب الحياة، مشهد كان كافي جدا إن سكار يبتدي يفهم إن أيدولوجيته كان غلط طول الوقت دا.

شخصية Winry Rockbell من أنمي Full Metal Alchemist
وينري روكبيل

حينما تبددت الغيوم

نقطة التحول الثالثة في حياة سكار كانت مقابلته مع الرائد مايلز، الشخص اللي قلب بوصلة سكار عن الإنتقام ١٨٠ درجة.
مايلز هو ضابط برتبة رائد في الجيش الأميستري، و في نفس الوقت مواطن بينحدر من نفس العرق اللي بينتمي له سكار، العرق الإشفالي. العرق اللي أصبح على حافة الإنقراض بعد حملة إبادة عرقية أطلقها الجيش الأميستري على إقليم إشفال لمدة ٧ سنين متواصلة.

كان طبيعي جدا إن سكار يصاب بالذهول لما شاف مايلز في الزي العسكري الأميستري و كمان برتبة رائد لدرجة إن أول سؤال وجهه ليه :
” انت إزاي قبلت على نفسك إنك تكون جزء من الجيش الأميستري ؟!! الجيش اللي أباد أهلك و أهلي ، اللي أباد العرق الإشفالي بشكل شبه كامل من ١٣ سنة بس ؟!! إزاي قبلت إنك تكون جزء منهم ؟!! “
عشان يرد عليه مايلز الرد اللي زلزل كيان سكار حتى النخاع :
” هدفي من الخدمة في الجيش الأميستري إني أغير وجهة النظر اللي الأميستريين بيشوفونا من خلالها. أكيد هدف صعب، أكيد هياخد وقت طويل، بس هحققه! هخلي الأميستريين يعترفوا بأخطائهم في حق شعبنا ، هخليهم يعترفوا بحقوق الشعب الإشفالي

الرد دا كان القشة التي قصمت ظهر البعير. الجملة دي كانت كافية جدا إن سكار يعترف إن الإنتقام عماه بالكامل لدرجة إنه مكانش شايف قدامه غير الدم اللي هيشبع رغبته للإنتقام. مسابش لنفسه فرصة للتفكير في إن كل هدف بيصفيه بيفتح دايرة كراهية لشخص جديد يسعى هو كمان للإنتقام. دايرة كراهية لانهائية مش هتتقفل أبدا.

و يدرك خطأه أخيرًا

هنا يقرر سكار إنه ياخد قرار جديد هيغير مسار حياته بشكل كامل. أنا ممكن كنت قاتل، سفاح، مسخ متعطش للدم بحجة الإنتقام. بس الوقت مفاتش إني أرجع لإنسانيتي تاني. لسه في وقت أحاول أصلح اللي أقدر أصلحه، حتى لو هتحالف مع نفس الأشخاص اللي كانوا أعدائي. لكن مش هرجع للمسخ اللي كان مسيطر عليا تحت دافع الإنتقام

بالنسبة ليا أنا شخصيا كمشاهد، لما كنت بتفرج على أنمي Fullmetal Alchemist : Brotherhood، شخصية سكار مكانش مجرد شخصية Villain في مجرد أنمي و خلاص
لسبب ما كنت شايف سكار على إنه تجسيد متقن الصنع للصراع الأزلي في النفس البشرية. بين رغبة الإنتقام و فضيلة الغفران، بين لعنة الكراهية المطلقة و حكمة العفو و الصفح.

لما جيت أفكر في الموضوع طبقت الفكرة نفسها على واقعنا العالمي.
بص لكمية الصراعات العسكرية و الطائفية و العرقية اللي بتعصف بالكوكب بتاعنا. تخيل في كام سكار أنتجته الصراعات و الحروب دي.
تخيل في كام سكار إتظلم و خسر كل حاجة و قرر يمشي حياته بمبدأ ” الدم بالدم “
تفتكر في كام سكار أصبح هدفه الوحيد في الحياة هو الإنتقام، و قرر يحول لنفسه إلى آلة قتل مهمتها الوحيدة إراقة الدماء تحت مسمى العدالة؟

لكن .. يظل القرار الأخير في إيده
إما إنه يستمر في القتل بهدف الإنتقام، و يوسع دايرة الكراهية اللي هتبتلع ناس تانيين و تحولهم لنسخ منه. أو إنه يلحق نفسه و يكسر دايرة الكراهية، و يستعيد منها ما تبقى من إنسانيته .. هنا القرار بيرجع له لوحده


قدمه لكم:Ahmad Mekky

تنسيق:Omar Essam


Like it? Share with your friends!

0
111 shares

What's Your Reaction?

hate hate
0
hate
confused confused
0
confused
fail fail
0
fail
fun fun
0
fun
geeky geeky
0
geeky
love love
0
love
lol lol
0
lol
omg omg
0
omg
win win
0
win
Omar

2 Comments

  1. فكرة المقال رائعة ولكنى اختلف فى نقطة جوهرية
    سكار شخصية لا تمثل الاشرار الحقيقين فى الانمى الذين لديهم فانز لأن الشرير هو شخص يملك مبدأ وطريقة حياة خاطئة وهو يعلم يقيناً انه يسير فى طريق خاطىء ولكن مع ذلك يستمر بالسير فى طريقه مثل مادارا ولايت ولولوش وستاين و… هذه شخصيات تملك هدف نقى وقررت تفيذه وهم يسيرون فى هذا الطريق الملىء بالدماء والجثث وهم يعلمون ان اخر جثة بهذا الطريق ستكون جثتهم………….هذه فئة من الاشرار يضيفون لأنمياتهم الكثير وهؤلاء يحبهم الفانز كثيراً…انا مثلاً افضل شخصية بالنسبة لى هى لولوش
    هناك نوع اخر من الأشرار وهو الكريه الحقير المجنون مثل دانزو وتيتش وفريزا و… هذه شخصيات الكثير من الفانز لا يطيقونها لحقارتها ؛ولكن كم الكره على حسب حقارة الفعل انا مثلاً يعجبنى تيتش وفريزا ولكن لا اتقبل دانزو
    هناك نوعية الاشرار الذى تتحدث عنها مثل سكار يكون يعميهم الغضب والحقد حتى تأتى الشعلة التى تنير طريقهم وهم بسطاء جداً ليس لهم هدف واضح يفكرون فيه بل تحركهم غريزتهم وتتحكم بهم وعندما يعودون للطريق الصحيح يقررون التكفير عن افعالهم وغالباً تموت هذه الشخصية بشكل بطولى لذا لا اعتبرهم يمثلون الأشرار حقاً

Choose A Format
Personality quiz
Series of questions that intends to reveal something about the personality
Trivia quiz
Series of questions with right and wrong answers that intends to check knowledge
Poll
Voting to make decisions or determine opinions
Story
Formatted Text with Embeds and Visuals
List
The Classic Internet Listicles
Countdown
The Classic Internet Countdowns
Open List
Submit your own item and vote up for the best submission
Ranked List
Upvote or downvote to decide the best list item
Meme
Upload your own images to make custom memes
Video
Youtube, Vimeo or Vine Embeds
Audio
Soundcloud or Mixcloud Embeds
Image
Photo or GIF
Gif
GIF format